ಗುರುದರ್ಶನ

ನಿನ್ನೊಳಗೆ ಎಲ್ಲವೂ ಇರುವುದರಿಂದಲೇ

ದರ್ಶನವು ಸಾಧ್ಯ;

ಗುರುದರ್ಶನವೆಂದರೆ

ದೊಡ್ಡದರ ದರ್ಶನ.

ಬ್ರಹ್ಮ ಕಲ್ಪ!

ಅಗಣಿತ ಬ್ರಹ್ಮಾಂಡಗಳಲ್ಲಿ

ಕಲ್ಪಿಸಿ

ಕಾಲಿಡುತ್ತಾ

ಅನಂತದಲ್ಲಿ ವ್ಯಾಪಿಸಿ,

ದೇಶ ಕಾಲದಳತೆಯಲ್ಲಿ

ದಿಕ್ಸೂಚಿಯಾಗಿ ಸಾಗಿ,

ಎಲ್ಲವ ರೂಪಿಸಿ, ನಿರೂಪಿಸಿ,

ಅಣು - ಪರಮಾಣುಗಳಲ್ಲಿ ಅಯಾನೇ ಆಗಿ,

ಚರಾಚರಗಳಲ್ಲಿ ಚಿರಂತನವಾಗಿ

ಚಲಿಸುತ್ತಿರುವೆ.

ಬೆಳಕಿನ ಚೈತನ್ಯದ್ದು

ನಡೆದದ್ದೇ ದಾರಿ,

ಪರಿಣಾಮ ಚಿರಂಜೀವ.

ಲೋಕ ಲೋಕಗಳ ಇಂಚಿಂಚಲ್ಲೂ ತೋಚಿ,

ಅಖಂಡ ಆಯಾಮಗಳಲ್ಲಿ ಗೋಚರಿಸಿ,

ಹಗಲಿರುಳೆನ್ನದೆ, ಹುಟ್ಟುಸಾವೆನ್ನದೆ,

ನಿನ್ನಷ್ಟಕ್ಕೆ ನೀನಿದ್ದು ಮಾಡುತಿಹೆ

ಸದ್ದು -

ನಿನ್ನದೊಂದು ವಿಸ್ಮಯದ ಚಲನೆ,

ಅಪರಿಮಿತ, ಅಸೀಮ,

ನಿಸ್ಸೀಮ.

ಪ್ರಕೃತಿಯಲ್ಲಿ ಪವಾಡ,

ನೂರಾರು ವಿದ್ಯೆ, ಚಮತ್ಕಾರ;

ನೂರೆಂಟರಲ್ಲಿ ನೀನು ಒಂದಾಗಿ,

ಕಣ್ತೆರೆದದ್ದು ದೊಡ್ಡದೇ.

✍️ ಶಿವಕುಮಾರ ಸಾಯ 'ಅಭಿಜಿತ್'