🔶ಅಭಿಜಿತ್ ನಕ್ಷತ್ರ🔶

ಹೊಸ ದೃಷ್ಟಿಯಂತೆ, ಹೊಸ ಸೃಷ್ಟಿಯಂತೆ ಹಸಿರಾದ ಹಾದಿ ಅಂದ; ತುಸು ತಂಪು ಗಾಳಿ, ಪರಿಮಳದ ಗಂಧ, ಉಸಿರಾಡುವಾಗ ಚಂದ. ಬದಲಾದ ರೂಪ, ಬದಲಾದ ಬಣ್ಣ, ಬದಲಾದ ಬಣ್ಣನೆ; ಮೊದಲಿಲ್ಲದಂತೆ, ಮುದವಳಿಯದಂತೆ, ಪದದಲ್ಲಿ ಬದಲಾವಣೆ! ನಭದಲ್ಲಿ ತಾರೆ - ಪ್ರಭೆ ಮಿಂಚಿದಂತೆ ಶುಭ ಲಹರಿಯೊಂದು ಬರಲು, ರಾಗ ಮೂಡುತ್ತ, ನಾದ ಹೊಮ್ಮುತ್ತ ಯೋಗ ನುಡಿಯ ತರಲು; ಅನುದಿನವು ಬೆಳಕು, ಅನುಕ್ಷಣವು ಹುರುಪು ಮಿನುಗುವುದು ಹೊಳಪು ನಿತ್ಯ; ಅನುಮಾನವಿಲ್ಲ, ಅಪಮಾನವಿಲ್ಲ, ಅನ್ವೇಷಿಸುವುದು ಸತ್ಯ. ✍️ ಶಿವಕುಮಾರ ಸಾಯ 'ಅಭಿಜಿತ್'

ಜಯ ಹೇ ಪ್ರಭುವೇ, ಜಯ ಹೇ ವಿಭುವೇ, ಜಯ ಹೇ ದೇವ ಜಯ ಜಯ ಹೇ ಜಯ ಸದ್ಗುಣನೇ, ಜಯ ಸರ್ವಜ್ಞನೇ, ಜಯ ಹೇ ಸಖನೇ ಜಯ ಜಯ ಹೇ ಜಯ ಪಾಲಕನೇ, ಜಯ ರಕ್ಷಕನೇ, ಜಯ ಹೇ ಬಂಧು ಜಯ ಜಯ ಹೇ ಜಯ ಪ್ರೇರಕನೇ, ಜಯ ಪೋಷಕನೇ, ಜಯ ಹೇ ಗುರುವೇ ಜಯ ಜಯ ಹೇ ✍️ ಶಿವಕುಮಾರ ಸಾಯ 'ಅಭಿಜಿತ್'

ಗಾಳಿ ಬೀಸಿ, ಮಳೆಯಲ್ಲಿ ಮಿಂದು ಪುಳಕ ಮೈದುಂಬಿದಾಗ ನೆಲದಲ್ಲಿ ಫಲ ಬೆಳೆದ ಕಳೆ- ಇಳೆಯ ಸೋಜಿಗ. ಬಯಲು ವಿಶಾಲವಾಗಿ ಇನ್ನೂ ಅಗಾಧ; ಆಕಾಶದಂತೆ ಭರವಸೆ. ಹೆಜ್ಜೆ-ಹೆಜ್ಜೆಗೊಂದು ಸಪ್ಪಳ, ಹೊಸ ಶಬ್ದ; ಪವಿತ್ರ ಮೆರವಣಿಗೆ. ಹಣ್ಣು-ಹೂವುಗಳಲ್ಲಿ ಅರಳಿದ ಕಣ್ಣು; ಸೃಷ್ಟಿಯ ಸಡಗರಕ್ಕೆ ದಿವ್ಯತೆಯ ರಂಗು. ✍️ ಶಿವಕುಮಾರ ಸಾಯ 'ಅಭಿಜಿತ್'

ಸರಳರೇಖೆಯ ಚಿಹ್ನೆ ಎಷ್ಟೊಂದು ಚೆನ್ನ; ಅದು ನಿರಂತರಕ್ಕೆ ಹರಿದು ಸಾಗುವ ಪ್ರಯಾಣ! ಮಿಲಿಯಾಂತರ ಗ್ಯಾಲಕ್ಸಿಗಳಾಚೆಗೂ ಇತಿ-ಮಿತಿಯಿಲ್ಲದ ಯಾನ; ಸೊಗಸಾದ ರೀತಿ, ಗತಿವಿಧಾನ. ಅವತಾರ-ಆವರ್ತನೆಯಿಲ್ಲ; ಪ್ರತಿದಿನ ಹೊಸ ಆವೃತ್ತಿ, ಹೊಸ ಹಾದಿ, ಹೊಸ ನೋಟ, ಹೊಸ ಓಟ, ಹೊಸ ಪ್ರವೃತ್ತಿ. ಮೂಢ ಅನಿಸಿಕೆಯಿಲ್ಲ, ಸಾಮ್ಯತೆಯ ಹುಡುಕಾಟವಿಲ್ಲ, ಸಂಚಾರ ಮಾತ್ರ; ನಿತ್ಯ ಯೌವನ ಸರಳರೇಖೆಯಲ್ಲಿ. ಕೊನೆ-ಮೊದಲು ತಿಳಿಯದೆ ಮುಗ್ಧತೆಯಿಂದ ಕ್ಷಣಕ್ಕೊಮ್ಮೆ ವಿಸ್ಮಯಪಡುತ್ತಾ- ಸರಳತೆಯ ಅನುಭವಿಸೋಣ. ✍️ ಶಿವಕುಮಾರ ಸಾಯ 'ಅಭಿಜಿತ್'

ಜ್ಞಾನದ ಜ್ಯೋತಿಯ ಬೆಳಗೋಣ ಅಜ್ಞಾನದ ಕೊಳೆ ತೊಳೆಯೋಣ ಸುಜ್ಞಾನದ ವರ ಪಡೆಯೋಣ ವಿಜ್ಞಾನದ ಜೊತೆ ನಡೆಯೋಣ ನಿತ್ಯವಸಂತದ ಹಚ್ಚನೆ ಹಸುರಿನ ಹೊಸ ಹಾಡುಗಳನು ಹಾಡೋಣ ವಿದ್ಯೆ ಬುದ್ಧಿಯಲಿ, ಸದ್ಭಾವನೆಯಲಿ ಸಾರ್ಥಕ ಬಗೆಯಲಿ ಬದುಕೋಣ ಒಡಲಲಿ ಶಕ್ತಿಯ ಪ್ರೇರಣೆಗೊಳಿಸಿ ಸ್ಫೂರ್ತಿಯ ತತ್ವವ ಬಿತ್ತೋಣ ಎಲ್ಲರ ಮನದಲಿ ನಾಳಿನ ಕನಸಿನ ಬಣ್ಣದ ಕಲ್ಪನೆ ಬೆಳೆಸೋಣ ✍️ ಶಿವಕುಮಾರ ಸಾಯ 'ಅಭಿಜಿತ್'